बजेटको लक्ष्य भेट्नेगरी काम गर्न अर्थमन्त्रीको निर्देशन

काठमाडौं। अर्थमन्त्री डा. युवराज खतिवडाले बजेटको लक्ष्य भेट्ने गरी काम गर्न निर्देशन दिएका छन् । चालू आर्थिक वर्षको बजेट कार्यान्वयनको अर्थ मन्त्रालयमा त्रैमासिक समीक्षा कार्यक्रममा अर्थमन्त्री खतिवडाले बजेटमा उल्लिखित लक्ष्य समयमै भेट्ने गरी मातहतका निकायलाई निर्देशन दिएका हुन् ।

उनले तोकिएको समयमा बजेटका उद्देश्य भेट्ने गरी काम गर्न आआफ्नो स्थानबाट सबै जुट्नुपर्ने आवश्यकतासमेत औंल्याए । तोकिएको समयभित्र काम गर्दा बजेटले राखेका लक्ष्य पूरा हुने भन्दै खतिवडाले त्यसैअनुरूप अघि बढ्न निर्देशन दिएका हुन् ।

विगतमा पनि लक्ष्यअनुसार बजेटरी खर्च हुनसकेको थिएन । विगतकै परम्परा दोहोरिँदै आएकोमा मन्त्री खतिवडाले असन्तुष्टिसमेत जनाए ।

बजेट कार्यान्वयनका लागि तयार पारिएको कार्ययोजना अनुरूप सम्बन्धित निकायबीच समन्वय गर्ने, बजेट कार्यान्वयनमा थप सक्रियता बढाउने, स्वीकृत नीतिको प्रभावकारी कार्यान्वयनमा जोड दिने र तोकिएको समयभित्रै कार्य सम्पादन गर्नुपर्नेमा उनले जोड दिए । त्यसो गर्न नसक्नेमाथि कडा रूपमा प्रस्तुत गर्ने आशयसमेत उनले व्यक्त गरे ।

समीक्षा बैठकमा नेपाल राष्ट्र बैंकका गभर्नर डा. चिरञ्जीवि नेपालले मुलुको वित्तीय सन्तुलनका लागि राष्ट्र बैंकले काम गर्दै आएको बताए । राष्ट्र बैंकले मौद्रिक नीति र वित्तीय नीतिअनुरूप निर्देशिका तयार गरी काम गरिरहेको त्यसक्रममा उनले बताए ।

त्यसक्रममा राजस्व सचिव शिशिरकुमार ढुंगानाले बजेट कार्यान्वयनमा देखिएका समस्या समाधानका लागि अर्थ मन्त्रालय सदैव तयार रहेको जानकारी दिए । कार्यान्वयन पक्ष बलियो बनाउन सबै निकायले स्वयं उत्प्रेरित भई काम गर्नुपर्ने खाँचो उनले औंल्याए । यसो गर्न सके तोकिएको समयभित्रै बजेट लक्षित उद्देश्य पूरा हुने उनको भनाइ छ ।

सरकारले चालू वर्षको पहिलो तीन महिनामा लक्ष्यअनुसार राजस्व संकलन गरेको भए पनि बजेट खर्च भने गर्न सकेको छैन । चालू वर्षको पहिलो तीन महिनाको अवधिमा राजस्व संकलन गत वर्षको तुलनामा ३८ प्रतिशतले वृद्धि भए पनि पुँजीगत खर्च भने ६ प्रतिशतको हाराहारीमा मात्रै छ ।

सरकारले खर्च गर्न नसक्दा चालू आर्थिक वर्षको साढे तीन महिना समय बितिसक्दा पुँजीगत खर्च ७ दशमलव ६७ प्रतिशत अर्थात् कुल बजेटमध्ये २४ अर्ब रुपैयाँ मात्रै खर्च भएको छ । पुँजीगत खर्च बढाउन अर्थ मन्त्रालयले यसअघि नै सम्पूर्ण मन्त्रालयलाई आन्तरिक रूपमा रकमान्तर गरी बजेट पूर्वाधार विकासमा अघि बढ्न निर्देशनसमेत दिइसकेको छ ।

पुँजीगत खर्चमा पुरानै अवस्था दोहोरिँदा अर्थमन्त्री डा. युवराज खतिवडाले नै पनि खर्च बढाउन सम्बद्ध निकायलाई घच्घच्याउँदै आएका छन् । बजेट भएका आयोजनाअघि नबढ्ने तर नयाँ कार्यक्रमलाई बजेट माग गर्ने क्रम निरन्तर बढेपछि अर्थ मन्त्रालयले काम अघि बढाउन निर्देशन दिएको हो ।

अर्थ मन्त्रालयको बजेट तथा कार्यक्रम महाशाखा प्रमुख एवं सहसचिव निर्मलहरि अधिकारीले आन्तरिक रूपमा रकमान्तर गरी पूर्वाधार आयोजना अघि बढाए पनि बिलको भुक्तानी नरोकिने भन्दै काम अघि बढाउन आग्रह गरे ।

एउटै मन्त्रालयमा वार्षिक बजेट तथा कार्यक्रममा परेका तर कार्यान्वयन चरणमा नगएका आयोजनाको बजेट थन्किएर बसेका छन् । तर त्यही मन्त्रालयअन्तर्गका सालबसाली आयोजनामा खर्च कम भएको भन्दै थप बजेटको माग भइरहेको छ ।

वर्षको सुरुमा बजेट थन्किएर बस्ने, अन्तिममा बजेट खर्चमा अनुशासनहीनता देखिने र हरेक वर्ष विनियोजित पुँजीगत बजेट नसकिने अवस्था दोहोरिरहेकाले अर्थ मन्त्रालय यसपटक खर्चमा केही खुकुलो रूपमा प्रस्तुत भएको हो ।

 

 

 

from राष्ट्रिय – Rajdhani Daily https://ift.tt/2Dne7LQ