सयपत्री मालाको बिक्री बढ्यो

काठमाडौं। यमपञ्चकको सुरुवातदेखि नै सयपत्री फूलको माला बिक्री बढेको छ । तिहारका लागि भारतबाट सयपत्री फूल ल्याइएको छ ।नेपालमा उत्पादन भएका सयपत्री फूल पनि बिक्रीका लागि तयारी अवस्था रहेको नेपाल फ्लोरिकल्चर एसोसिएसनका अध्यक्ष कुमार कसजू श्रेष्ठले बताए । सयपत्री कागतिहारदेखि लक्ष्मीपूजाको दिनसम्म बढी बिक्री हुने गर्दछ ।

यो वर्ष भारतबाट ३० लाख रुपैयाँ बराबरको तीन लाख सयपत्रीको माला ल्याइएको छ । तिहारमा मात्रै १ करोड रुपैयाँ बराबरको फूलको कारोबार हुन्छ । यसपटकको तिहारमा भारतबाट थौरै मूल्यको माला आयात गर्ने तयारी रहे पनि माग बढेकाले फूलको माला आयातमा वृद्धि गर्नुपरेको श्रेष्ठले बताए । उनले भने, ‘अहिले स्वदेशमै ९० प्रतिशत फूल उत्पादन हुन थालेको छ । यसअघिका वर्षमा १८ प्रतिशत फूल भारतबाट आयात गर्नुपर्ने अवस्था थियो ।’

यो वर्ष उपभोक्ताले एउटा सयपत्री मालाको मूल्य ६० देखि ७० रुपैयाँ बढी तिर्नुपर्ने देखिन्छ । गत वर्ष ५० देखि ६० रुपैयाँ बढी मूल्यमा माला किन्नुपर्ने अवस्था थियो । फ्लोरिकल्चर एसोसिएसनका अनुसार यस वर्ष गत वर्षभन्दा दुई लाख बढी फूलको माला खपत हुने अवस्था छ । गत वर्ष तिहारमा १५ लाख माला खपत भएको थियो । यो वर्ष भने बजारमा १७ लाख मालाको माग रहेको बताइएको छ ।

मुख्यतः तिहारमा प्रयोग हुने सयपत्री, मखमली र गोदावरीमध्ये सयपत्री मात्रै भारतबाट आयात गर्नुपर्ने अवस्था छ । मखमली र गोदावरी स्वदेशमै पर्याप्त मात्रामा उत्पादन हुन्छ । अघिल्ला वर्षको तुलनामा यस वर्ष तिहार ढिला छ । ढिला भएका कारण फूल फुलेर सुकिसकेका छन् । पात्रो हेरेर व्यावसायिक रूपमा फूल लगाउँदा व्यवसायीको मात्रै फूल प्रयोग गर्न मिल्ने अवस्था छ । गत वर्षभन्दा फूलको मूल्यमा वृद्धि हुनेछ ।

प्रत्येक वर्ष १० देखि १५ प्रतिशत स्वदेशी फूल उत्पादनमा वृद्धि हुने गरेको छ । माग पनि सँगसँगै बढ्ने गरेको छ । यस वर्ष तिहारका लागि दुई लाखभन्दा बढी माला आयात गरिने एसोसिएसनका अध्यक्ष श्रेष्ठले जानकारी दिए । सबैभन्दा बढी काठमाडौं उपत्यकामै फूल खपत हुने गरेको छ । काठमाडौं उपत्यकामा झन्डै ६० प्रतिशत माला खपत हुन्छ । गत वर्ष १ अर्ब ८५ करोडको फूलको कारोबार भएको थियो । तिहार र अन्य मौसममा गरी ११ करोडको फूल वार्षिक रूपमा विदेशबाट आयात गरिँदै आइएको छ ।

from Rajdhani Daily https://ift.tt/2D632hu