हेराथले गरे सन्न्यास घोषणा

श्रीलंकाका स्पिनर रंगना हेराथले गालेमा जारी इंग्ल्यान्डविरुद्धको पहिलो टेस्टपछि अन्तर्राष्ट्रिय क्रिकेटबाट सन्न्यास लिने घोषणा गरेका छन् । उनको सन्न्याससँगै १९९९ अघि टेस्टमा डेब्यु गर्ने विश्वका सबै खेलाडी टेस्टबाट बिदा हुनेछन् । उनी १९९९ अघि टेस्ट क्रिकेटमा डेब्यु गरेर मैदानमा सक्रिय रहेका एक मात्र खेलाडी हुन् । उनले कुल ५ सय २२ विकेट लिएका छन् । उनले ९२ टेस्टबाट ४ सय ३० विकेट लिएका छन् भने ७१ एकदिवसीय खेलबाट ७१ विकेट लिएका छन् । त्यसैगरी, उनले १७ टी–२० खेलबाट १८ विकेट हात पारेका छन् ।

डेब्यु मैदानबाटै सन्न्यास
१९९९ मा श्रीलंकाको गालेस्थित क्रिकेट मैदानमा अस्टे«लियाविरुद्ध डेब्यु गरेका हेराथले सोही मैदानमै आफ्नो करिअरको अन्तिम टेस्ट खेल्दै छन् । अन्तर्राष्ट्रिय क्रिकेटमा १९९९ अघि डेब्यु गर्ने खेलाडीमा वेस्टइन्डिजका क्रिस गेल र पाकिस्तानका सोएब मलिक मात्र अहिले सक्रिय छन् । भारतीय क्रिकेटर हरभजन सिंहले १९९८ मा टेस्टमा डेब्यु गरेका थिए । औपचारिक सन्न्यास नलिए पनि उनी २०१५ यता भारतीय टिममा पर्न असफल छन् ।

मुरलिथरन टिममा रहँदा ११ वर्षमा २२ टेस्ट मात्र
हेराथले १९९९ मै टेस्टमा डेब्यु गरे पनि मुथैया मुरलिथरनका कारण टिममा निकै कम समय मात्र स्थान बनाए । २०१० सम्म उनले मात्र २२ टेस्ट मात्र खेलेका थिए । यसदौरान उनले ३७.८८ को औसतमा ७१ विकेट लिएका थिए । २०१० मा मुरलिथरनको सन्न्यासपछि भने उनी टिमका नियमित सदस्य बने । पछिल्ला ८ वर्षमा उनले २५.९८ को औसतमा ३ सय ५९ विकेट लिएका थिए ।

पाकिस्तानविरुद्ध सर्वाधिक टेस्ट विकेट
हेराथले डिसेम्बर २०११ मा श्रीलंकाविरुद्ध दक्षिण अफ्रिकामा पहिलो टेस्ट जितेका थिए । यस खेलमा उनले ११ विकेट लिएका थिए । २०१२ मा ६० विकेट लिएका हेराथले टेस्ट वरीयतामा नम्बर एक बलरको स्थानसमेत हात पारे । उनले पाकिस्तानविरुद्ध २०१४ मा भएको कोलम्बो टेस्टमा पहिलो इनिङमा ९ तथा दोस्रोमा ५ विकेट लिएका थिए । पाकिस्तानविरुद्ध उनले सर्वाधिक २ सय ३० विकेट लिएका छन् ।

गालेमा सय विकेट पूरा गर्ने लक्ष्य
गालेमा मुरलिथरनपछि सयभन्दा बढी विकेट लिने खेलाडीको कीर्तिमान बनाउने ध्याउन्नमा हेराथ छन् । इंग्ल्यान्डविरुद्ध १ मात्र विकेट लिए उनले मुरलिथरनको कीर्तिमान भेट्टाउनेछन् । उनको राम्रो प्रदर्शनका कारण उक्त कीर्तिमान भेट्टाउने विश्वास लिइएको छ ।

३५ वर्षको उमेरपछि २ सय ३० विकेट लिने एक्ला बलर
हेराथको उमेर ४० वर्ष नाघिसकेको छ । उनले पछिल्लो ५ वर्षमा २ सय ३० विकेट लिएका छन् । उनले ३५ वर्षको उमेरपछि यति धेरै विकेट लिँदै संसारमा बढी उमेरमा सर्वाधिक विकेट लिने खेलाडीको कीर्तिमान बनाएका छन् । उनले यदि अन्तिम टेस्टमा ५ विकेट लिए भने न्युजिल्यान्डका रिचर्ड हेडली (४३१), इंग्ल्यान्डका स्टुअर्ट ब्राड (४३३), र भारतका कपिलदेव (४३४)लाई पछि छाड्दै सर्वाधिक विकेट लिने विश्वको सातौँ बलर बन्नेछन् ।

• हेराथबाहेक १९९९ अघि डेब्यु गर्ने विश्वका कुनै पनि खेलाडी टेस्ट क्रिकेटमा छैनन् । उनको बिदाइसँगै टेस्ट क्रिकेटको गोल्डेन पुस्ताको अन्त भएको छ ।
• एकदिवसीयमा भने १९९९ अघि डेब्यु गर्नेमा वेस्टइन्डिजका क्रिस गेल र पाकिस्तानी सोएब मलिक मात्र सक्रिय छन् ।
• हेराथको नाममा अन्तर्राष्ट्रिय क्रिकेटमा अहिलेसम्म ५ सय २२ विकेट छ ।

The post हेराथले गरे सन्न्यास घोषणा appeared first on Naya Patrika.

from Naya Patrika https://ift.tt/2RCqln1