व्यापारीको आफूखुसी मूल्य, सरकारी अनुगमन फितलो

काठमाडौं। सरकारले बजार अनुगमन पर्याप्त रूपमा गर्न नसक्दा व्यवसायीले आफूखुसी मूल्य राख्ने गरेका छन् । फितलो बजार अनुगमनको फाइदा उठाउँदै व्यापारीले तिहारको सामानमा मनपरी मूल्य लिइरहेका छन् ।

तिहारमा प्रयोग हुने सबै जस्तो सामानमा मनपरी मूल्य लिएर उपभोक्तालाई ठगी गर्दा समेत सरकार भने मौन रहेको छ । तिहारको नाममा उपभोक्तालाई ठगिरहँदा समेत सरकार बेखबरझैं बनिरहेको छ । तिहार नजिकिन थालेपछि बजारमा सामान किन्नेहरूको चहलपहल बढेको छ । चहलपह बढेसँगै उपभोक्ता ठगिने क्रममा पनि वृद्धि भएको छ ।

सिनामंगल बस्दै आएकी ज्योति सापकोटा कार्की तिहारका लागि सामान किन्न असन बजारमा आएकी थिइन् । उनले सुस्केरा मार्दै भनिन, ‘उफ, यस वर्ष बजारमा तिहारको सामान महँगीले छोइनसक्नु भएको रहेछ, कसरी तिहार मनाउने ? सामानको मूल्य सुन्दै चिन्ता बढेको छ ।’ पसल पसलपिच्छे व्यापारीले एउटै सामानको फरक फरक मूल्य लिइरहेका छन् । तिहारको पूजा सामानदेखि भाइमसलामा व्यापारीको आफ्नै मूल्य रहेको छ । यति मात्रै नभई व्यापारीले बढी मूल्य लिनुका साथै गुणस्तरहीन सामान बिक्री गरिरहेका पनि उपभोक्ताले बताए । व्यापारीले म्याद सकिएका भाइमसलालाई प्याकेट प्याकेट बनाएर उपभोक्तालाई बिक्री गरिरहेका छन् । यति मात्र नभई व्यापारीले  तिहारका लागि बिक्रीमा राखेका भाइमसलाको एउटै साइज र तौलका प्याकेटको मूल्य व्यापारीले फरक फरक मूल्य लिने गरेको पनि कार्कीले बताइन् ।

 

भाइमसलाको मूल्यसूची

२०७५ को मूल्य (रु÷प्रतिकेजी)    २०७४  मूल्य (रु÷प्रतिकेजी)

सुकमेल २ हजार ७ सय         १ हजार ६ सय

काजु  १ हजार ७ सय    १ हजार ६ सय

किसमिस ७ सय        ५ सय

ओखर ५ सय ५०       ४ सय

ल्वाङ १ हजार ५ सय    १ हजार ३ सय

मखना १ हजार २ सय    ९ सय

छोकडा १ सय ४०       १ सय ७६

एउटै साइज र एउटै तौल भएका सामानको कतै ९० कतै ८० त कतै ५० समेत लिने गरेको उनको भनाइ छ । भाइमसलामा मात्र नभएर भाइटीकाको दिनमा प्रयोग हुने कलरसमेतको फरक फरक मूल्य रहेका छन् । तिहारमा धेरै भन्दा धेरै भाइमसला बिक्री हुने हुँदा उपभोक्तालाई ठगिनबाट जोगाउन सरकारी निकायले अनुगमन गर्नुपर्ने उनको भनाइ छ ।

त्यस्तै, बानेश्वर बस्दै आएकी सीता कार्कीले यस वर्ष तिहारमा व्यापारीले विभिन्न बहानमा सामानको पसलपिच्छे मनपरी मूल्य लिइरहेको बताइन् ।

गत वर्ष ५० रुपैयाँ पाइने सोही सामान यस वर्ष ९० रुपैयाँ पर्ने उनले बताइन् । पूजा सामानदेखि भाइमसलामा समेत मनपरी मूल्य लिइरहेको बताइन् ।

उनले भनिन्, ‘व्यापारीले अहिले एक सयमा के आउँछ र भन्दै  आफूखुसी मूल्य लिइरहेका छन् ।’ सँगै जोडिएका पसलमा समेत फरक फरक मूल्य लिइरहेको उनको भनाइ छ । सरकारले बजार अनुगमन नगर्दा  व्यापारीले मनपरी मूल्य लिएर उपभोक्तालाई ठगिरहेको बताइन् ।

असन बजारमा लामो समयदेखि व्यापार गर्दै आएका सन्तोस श्रेष्ठले एउटा भाइमसलाको प्याकेटलाई ५० रुपैयाँदेखि ६ सयमा बिक्री गरिरहेको बताए ।

इन्द्रचोकस्थित भाइमसलाको व्यापार गर्दै आएका रमेश महर्जले सोही साइज र सोही तौल भएको भाइमसलाको प्याकेटको ७ सयदेखि ९०, रुपैयाँ लिइरहेका थिए ।   बजारमा व्यापारीले मनपरी मूल्य लिइरहेका बेला सरकारको अनुगमन निरन्तर भइरहेको उद्योग वाणिज्य तथा आपूर्ति मन्त्रालयका प्रवक्ता नवराज ढकाल बताउँछन् ।

उनले भने, ‘यदि कुनै व्यापारीले मनपरी मूल्य लिएको भेटिएमा कडाइसाथ उपभोक्ता संरक्षण ऐन, २०७५ बमोजिम कानुनी कारबाही गरिनेछ  ।  यो वर्ष तिहारमा भाइमसलाको मूल्य अत्यधिक वृद्धि भएको छ । तिहारमा बढी खपत हुने मौका छोपेर व्यवसायीले भाइमसलाको मूल्य बढाएका हुन् ।

 

 

 

from राष्ट्रिय – Rajdhani Daily https://ift.tt/2QhpS9v