‘कर्मचारी संयन्त्रबाट मन्त्री आफैं प्रशिक्षित हुँदा समस्या’

मोरङ। नेपाल कम्युनिस्ट पार्टी (नेकपा)का अध्यक्ष पुष्पकमल दाहालले कर्मचारी संयन्त्रलाई राजनीतिक परिवर्तनको मर्म बोध गराउन नसक्दा प्राप्त उपलब्धि संस्थागत गर्न कठिन भइरहेको बताएका छन् ।

सोमबार विराटनगरमा नेकपा मोरङले आयोजना गरेको शुभकामना आदानप्रदान तथा कार्यकर्ता प्रशिक्षण कार्यक्रमलाई सम्बोधन गर्दै दाहालले कर्मचारीलाई प्रशिक्षित गर्न नसकिएको तर्क गरे । उनले भने, ‘संघीयताको मर्म कर्मचारी संयन्त्रलाई राजनीतिक नेतृत्वले बुझाउन नसक्दा कार्यान्वयनमा समस्या उत्पन्न भइरहेको छ ।’ मन्त्रीहरूले पनि कर्मचारीलाइ परिवर्तनको मर्म बुझाउने भन्दा उनीहरूबाटै प्रशिक्षित भएर यथास्थितिमा रमाउने खतरा देखिएको दाहालले बताए । उनले संघीय लोकतान्त्रिीक गणतन्त्रअनुकूलको नयाँ ऐन बनाएर अगाडि बढ्नुपर्नेमा जोड दिए ।

पूर्वप्रधानमन्त्री दाहालले सरकारले दीर्घकालीन महŒवका कामलाई जोड दिँदा तत्कालिक काम ओझेलमा परेको बताए । उनले अब सरकारले जनताले अनुभूत गर्ने गरी काम गर्ने विश्वास व्यक्त गरे । सडकका खाल्डाखुल्डी पुर्नेदेखि सुकुम्बासी समस्या समाधान र सामाजिक सुरक्षा भत्ता वृद्धि गर्नेतर्फ पनि सरकार अघि बढेको उनले जानकारी दिए ।

अन्तर्राष्ट्रिय क्षेत्रलाई नै नयाँ सन्देश दिने गरी पार्टी एक बनाउने अभियानमा आफू लागिपरेको दाहालले बताए । उनले पार्टी एकताले राष्ट्रिय तथा अन्तर्राष्ट्रिय क्षेत्रमा समेत सकारात्मक प्रभाव परेको बताए । उनले भने, ‘एकताले सबै क्षेत्रलाई सकारात्मक प्रभाव पारेको छ । यो एकतालाई कुनै पनि शक्तिले तोड्न सक्दैन ।’ पार्टी एकताकै कारण जनताले दुई तिहाइ मत दिएकाले यसको सही सम्मान हुनुपर्नेमा उनले जोड दिए ।

कार्यक्रममा बोल्दै नेकपाका महासचिव विष्णु पौडेलले विकास र समृद्धि हासिल गर्ने सपना पूरा गर्न नेकपाको सरकार सफल हुने दाबी गरे । दुई तिहाइको सरकार सफल भएमा आफूहरूको राजनीतिक यात्रा समाप्त हुने त्रासले अन्य दलहरू भ्रमको खेतीमा लागेको आरोप लगाए ।

सरकारको गियर परिवर्तन हुन्छ

नेपाल कम्युनिस्ट पार्टी (नेकपा)का अध्यक्ष पुष्पकमल दाहालले सरकारले काम कारबाहीलाई तीव्रता दिन चाँडै गियर परिर्वतन गर्ने बताएका छन् । सोमबार विराटनगर विमानस्थलमा सञ्चारकर्मीसँगको कुराकानीमा उनले हिलोमैलोको समय सकिएपछि सवारी धनीले गाडीको गियर परिवर्तन गरेजस्तै सरकारको कामले पनि गियर परिर्वतन गर्ने बताएका हुन् ।

दाहालले वर्तमान सरकारको तत्काल पुनर्गठनको सम्भावना नरहेको बताए । उनले गठन भएको एक वर्ष मात्र पुगेको र सरकारले आफ्नो घोषणापत्रअनुुसार काम गरिरहेकाले सरकार पुनर्गठनको आवश्यकता अहिले नरहेको उनले बताए ।

फरक प्रसंगमा दाहालले पार्टी एकताको विषय सोचेअनुरूप केही ढिला भएको स्वीकार गरेका छन् । उनले केन्द्रमा विवाद भएका कारण भने पार्टी एकतामा ढिला नभएको प्रस्ट पारे । ‘भोलि आउने अप्ठ्यारोलाई अहिले नै सच्याएर जाने योजना बनाएकाले पार्टी एकताको कार्य ढिला हुन पु्गेको हो,’ दाहालले भने ।

 

from Rajdhani Daily https://ift.tt/2D7J5XH