दसैंमा घर रंगाउन खोज्दा परिवारै उजाडियो

ओपेन्द्र बस्नेत
तुलसीपुर

ढिस्कोले पुरिएर एकै परिवारका तीन जनाको मृत्यु भएपछि दाङको मौरीघाट गाउँ शोकमा डुबेको छ । दसैं नजिकिँदै गर्दा घर रंगाउने कमेरो माटो लिन गएका राप्ती गाउँपालिका–४ मौरीघाट निवासी शिवचरण चौंधरीका ३० वर्षीया छोरी श्यामा चौधरी, ३५ वर्षीया बुहारी मीना चौंधरी र १२ वर्षीया नातिनी १२ वर्षकी रेजिना चौधरीको मृत्यु भएको जिल्ला प्रहरी कार्यालय दाङका प्रवक्ता प्रहरी नायब उपरीक्षक रामबहादुर घर्तीले जानकारी दिए ।

बिहान १० बजे घरदेखि केही टाढाको दूरीमा रहेको दोलै खोलामा माटो लिन गएका उनीहरू अबेरसम्म नफर्किएपछि खोज्न जाँदा मोटोले परिएको अवस्थामा फेला परेको प्रहरीले बताएको छ । उनीहरूको घटनस्थलमै मृत्यु भएको प्रहरीको भनाइ छ । घटनास्थल भालुवाङदेखि करिब ७ किलोमिटर टाढाको दूरीमा पर्छ । ‘माटो लिन गएका तीनैजना अबेरसम्म नफकेपछि खोजी गरिएको थियो,’ राप्ती गाउँपालिका–४ का वडाध्यक्ष विष्णुबहादुर जीसीले भने, ‘छिमेकी गएर हेर्दा चप्पल बाहिर रहेको र अलिकति शरीर देखिएपछि पुरिएको भनेर थाहा भएको हो ।’

मृतक तीनै जनाको थारू संस्कारअनुसार शनिबार राति नै अन्त्यष्टि गरिएको छ । मृतक मीनाका श्रीमान् एक वर्षदेखि रोजगारीका लागि विदेशमा छन् । घर रंगाउने सपना बुनेर माटो लिन गएका तीन जनाको एकै चिहान भएपछि शिवचरण चौधरीको घर उजाडिएको छ ।

वडाध्यक्ष जीसीका अनुसार त्यहाँ दुई वर्षअघि पनि घर लिप्ने माटो लिन गएकी एक महिलाको माटोको ढिस्कोले पुरिएर अकालमा मृत्यु भएको थियो । त्यहाँका स्थानीहरूले बर्सेनि घर पोत्ने माटो दोलै खोलाबाट नै ल्याउने गरेका छन् । माटो लिन गएका महिलाको मृत्यु भएपछि अब राप्ती गाउँपालिकालेले सचेतनाका कार्यक्रम सञ्चालन गर्ने जनाएको छ ।

‘नुहुनुपर्ने घटना भयो,’ राप्ती गाउँपालिकाका अध्यक्ष नुमानन्द सुवेदीले भने, ‘अब प्रत्येक वडामा जनचेनाका कार्यक्रमहरु संचालन गरिनेछ । आइन्दा अकालमा कसैको मृत्यु नहोस् ।’

from Rajdhani Daily https://ift.tt/2QiwLa9