शम्भूजितको स्वर्णिम संगीतमा झुमे दर्शक

राजधानी समाचारदाता
काठमाडौं

अग्रज गीतकार एवं संगीतकार तथा गायक शम्भूजित बाँस्कोटाको संगीतमा काठमाडौंवासी शनिबार अपराह्न राजधानीको टुँडिखेलमा झुमेका छन् । साधना कलाकेन्द्रद्वारा आयोगित ‘शम्भूजित स्वर्णिम संगीत यात्रा–२०१८’ अन्तर्गतको टुँडिखेलमा सम्पन्न पहिलो कन्सर्टमा दर्शक झुमेका हुन् ।

करिब साढे ३ घण्टा चलेको प्रत्यक्ष गायनसहितको सो कार्यक्रममा बाँस्कोटा आफैंले चारवटा गीत गाएर कार्यक्रमलाई स्वर्णिम संगीतमय तुल्याए ।

परेवा उडाएर शान्तिको कामनासहित सुरु गरिएको सो सांगीतिक यात्राको पहिलो कन्सर्टमा प्ररम्भमा अग्रज गायक प्रेमध्वज प्रधान प्रस्तुत भए । उनले नर्तकी बनी अभिनय ग-यौ…, तिम्रो घुम्टो…र देउरालीमा माया…जस्ता गीत २०३४ सालतिर रेकर्ड गरिएको जानकारी दिँदै गाएर दर्शकलाई मन्त्रमुग्ध तुल्याए ।

अग्रज गायक बाँस्कोटालाई गाउन दर्शकबाट हुटिङ भएपछि उनले अच्छा लेकिन लन्डनको चिसोले सताउला…गीत सुनाए । यो गीतमा दर्शकहरू पसिना बगाउँदै नाचे ।

राष्ट्रिय सभाकी सांसद तथा गायिका कोमल ओली र गायक बाँस्कोटाले बाँझो खेतमा छड्के सलाम छ मायालाई…गीत गाए । यतिबेला दर्शकदीर्घाबाट सर्वाधिक हुटिङ आयो । यो गीतमा पनि दर्शक त्यत्तिकै नाचे ।

मनोहर सुनामको निर्देशनमा प्रत्यक्ष संगीतमा करिब दुई दर्जन कलाकारले बाँस्कोटाद्वारा संगीतबद्ध गीत यो संगीत यात्रामा प्रस्तुत गरे ।

उमेश पाण्डे र निशा देशारले सँयुक्त रूपमा गाएको रातो टीका निधारमा टलक्क टल्कियो…गीतमा पनि दर्शक त्यत्तिकै नाचेका थिए । यो प्रस्तुति पनि कार्यक्रमका उत्कृष्ट पाटो बनेको थियो ।

गायक आनन्द कार्की र गायिका निशा देशारले युगल गीतबाट दर्शकलाई मोहित तुल्याए । यी दुईले जनमजनम जिउँला सँगै…गीत गाएका थिए ।

गायिका देविका बन्दनाले यस्तै रहेछ यहाँको चलन…, भरे आउँछु सपनीमा…लगायतका गीतमार्फत कार्यक्रमको रौनक बढाउँदै दर्शकको मन जितिन् ।

यस्तै, गायक यम बरालले चलचित्र अल्लारेको अब चोटहरूले पिरोल्दैन मलाई…गाउँदा दर्शकहरू पनि कार्यक्रममा स्तब्ध देखिए । यस्तै, गायक विश्व नेपालीले के भुँल गरें मैले…मा पनि दर्शक मौन देखिए । जब उनले यो साइनो मायाको… गीत गाए, त्यतिबेला बल्ल दर्शक रमाए ।

गायक अमर तण्डुकारले गाएको धेरै दिन भो तिम्रो झझल्को…, युवराज चौलागाईंले मन पराउने हजार भेटिन्छन्…, मनोजराजले यो माया के हो, आगो हो कि पानी…, समपना हो यो मेरो भने…गीत सुनाए ।

बानिका प्रधानले गाएको मेरा आशक्तिका…, सुरेश लामाले गाएको एकै नजरमा माया बस्यो है…, जबजब म एक्लो हुन्छु…जस्ता गीतले पनि कार्यक्रममा सहभागी दर्शकलाई झुमायो ।

टीका प्रसाईंले चैत मास खडेरीमा…, सुरजकुमार थापाले अब त यो जिन्दगानी…, सञ्जय तुम्रुकले म त अब रिसाउँछु बोल्दै बोल्दिनँ… सहितका गीतमार्फत स्वर्णिम सांगीतिक यात्राको माहोल जमाए ।

सो कार्यक्रममा प्रेमध्वज प्रधान, शम्भूजित बाँस्कोटा, मिलन मोक्तान, अनन्द कार्कीसहित सबैजसो गायक–गायिकाले अग्रज गीतकार एवं प्राज्ञ उन्नति बोहरा ‘शिला’को गीतिपुस्तक ‘फर्की आऊ शान्ति तिमी’ को संयुक्त विमोचन गरे ।

आयोजक मिलन मोक्तानले शम्भूजित स्वर्णिम सांगीतिक यात्रा आइतबार काठमाडौंको होटल सोल्टीमा साँझ ६ बजेबाट हुने पनि जानकारी गराए । शनिबार टुँडिखेलमा गाउने सबै कलाकारको स्वरमा सोल्टीमा गीत सुन्न पाइनेछ ।

यस्तै, भारतबाट आएका कलाकार अनुराध पौडवाल, सञ्जीवनी तथा मदनकृष्ण श्रेष्ठ, हरिवंश आचार्य, योगेश वैद्य, राजेशपायल राई, दीपक खरेलसहितले पनि सोल्टीमा गीतहरू गाउने आयोजक मिलन मोक्तानले कार्यक्रममा बताए ।

from Rajdhani Daily https://ift.tt/2y0GlXD