हलमै गएर ऋषि धमलापत्नीको फिल्म हेरे पूर्वप्रधानमन्त्री खनालले

काठमाडौं– पछिल्लो समय नेताहरुले नेपाली चलचित्र हेर्न थालेका छन् । यसै क्रममा सत्तारुढ दल नेकपाका वरिष्ठ नेता एवं पूर्वप्रधानमन्त्री झलनाथ खनाल र प्रतिनिधिसभाका उपसभामुख शिवमाया तुम्बाहाम्फेले शनिबार चलचित्र हलमा पुगेर ‘अनुराग’ चलचित्र हेरेका छन् ।

कमलपोखरीस्थित बिग मुभिजमा यो चलचित्र हेरेपछि अनुराग राम्रो चलचित्र बनेको र आफूलाई मन परेको खनालले सञ्चारकर्मीलाई बताए । यो चलचित्रले अहिलेका युवा पुस्ताको मन जित्ने जिकिर पनि पूर्वप्रधानमन्त्री खनालले गरे । त्यस्तै, प्रतिनिधिसभाका उपसभामुख तुम्बाहाम्फेले पनि आफैंले धेरै समयपछि हलमा आएर यो नेपाली चलचित्र हेरेको बताइन् । अनुरागमा आफूलाई कलाकारहरुको अभिनय जीवन्त लागेको र यो समसामयिक चलचित्र बनेको तुम्बाहाम्फेले बताइन् ।

हास्य कलाकार जितु नेपालसहित विभिन्न व्यक्तिहरुले पूर्वप्रधानमन्त्री खनालसँगै यो चलचित्र हेरे । सांगीतिक प्रेमकथा रहेको ‘अनुराग’ शुक्रबार रिलिज भएको हो । यसमा एलिजा गौतम, समुन्द्र पण्डित, चलचित्रमा ठिलेंन लामा, सरोज खनाल, रुपा राना, राजाराम पौडेल, शिशिर राना, मोहन निरौला, विश्व बस्नेतको अभिनय छ । यो चलचित्रलाई सत्यराज चौलागाईले निर्देशन गरेका हुन् ।

from Rajdhani Daily https://ift.tt/2zG5yJ2