बलान नदीमा दुर्घटनाको जोखिम

पप्पु कन्स्ट्रक्सनसहितको जोइन्ट भेन्चरले ठेक्का लिएको हुलाकी सडकअन्तर्गत सिरहा–सप्तरी जोड्ने बलान नदीको पुलमा पिलर मात्र हालेर छाड्दा दुर्घटनाको जोखिम बढेको छ । यसरी नै छाडिएको पिलरमा ठोक्किएर रौतहटको गौर नगरपालिका– ४ स्थित लालबकैया नदीमा डुंगा पल्टिँदा करिब महिना दिनअघि पाँचजनाको मृत्यु भएको थियो ।

पुल बनेपछि सिरहाको भगवानपुर गाउँपालिका र सप्तरीको बलान बिहुल गाउँपालिका जोडिनेछ । पुल नहुँदा भने स्थानीय नदीमा पसेरै पार हुने गरेका छन् । गाईवस्तु पनि त्यसरी नै तारिन्छ । साइकल र अन्य सामान बोकेर नदीमा पस्दा जोखिम हुने स्थानीयको गुनासो छ ।

रौतहटको लालबकैयामा पर्ने पुल ठेक्का लिने पप्पु कन्स्ट्रक्सनले नै बलानको पनि ठेक्का पाएको हो । पुल ४० महिनामा बनाइसक्ने गरी १५ फागुन ०६८ मा पप्पु एन्ड शर्मा जेभीले ठेक्का लिएको थियो । तर, ६ वर्षमा १३ वटा पिलर मात्र हालिएको छ ।

पप्पु एन्ड शर्मा जेभी बलान पुलका साइट इन्जिनियर जमुना यादवका अनुसार पुल चार सय ६३ मिटर लामो र सात दशमलव २० मिटर चौडाइको हुनेछ । पप्पु एन्ड शर्मा जेभीले पुल २४ करोड ६२ लाखमा ठेक्का पाएको हो । ‘हामीले पुलको पूर्वपट्टिबाट १३ वटा पिलरको फाउन्डेसनदेखि सबस्ट्रक्चरसम्मको निर्माण सकेका छौँ,’ साइट इन्जिनियर यादवले भने ।

धार परिवर्तन हुँदा कटान
बलान पुलको डिजाइन दशकअघि नै भएको हो । सो डिजाइनअनुसार पुल निर्माण थालिएको थियो । तर, समयमा नै निर्माण नसकिँदा नदीको धार सिरहातिर सोझिएको छ ।प्रत्येक वर्ष वर्षामा नदीले सिरहातिरको खेतीयोग्य जमिन कटान गरिरहेको स्थानीय रविलाल पासवानले बताए । ‘नदीको धार परिवर्तन हुँदा सिरहाको सखुवानन्कारकट्टीको इटहर्वा, कल्याणपुर, भगवानपुर गाउँपालिकाको पूर्वी भागमा पर्ने सयौँ बिघा जग्गा कटान भइरहेको छ,’ उनले भने ।

अर्का स्थानीय श्रीप्रसाद पण्डितले नदीमा बाँध बाँध्ने र पुल हाल्ने काम नहुँदा सुकुम्बासी हुने अवस्था आएको बताए । उनले भने, ‘पुल नहुँदा आवतजावत गर्न कठिनाइ झेल्नुपरेको त छ नै, जग्गा कटान भएर सुकुम्बासी नै बन्ने अवस्थामा छौँ ।’

कमला नदीमा पनि  पिलर मात्र
पप्पु कन्स्ट्रक्सनसमेत संलग्न सिरहाको अर्को पुल निर्माण पनि अलपत्र छ । पप्पु एन्ड लुम्बिनी जेभीले ठेक्का लिएको हुलाकी सडकअन्तर्गत सिरहा र धनुषालाई जोड्ने कमला नदीको पुल चार वर्षअघि नै बनिसक्नुपर्ने थियो । तर, यो पुलमा पनि १३ वटा पिलर मात्र हालेर छाडिएको छ । अलपत्र पिलरका कारण यहाँ पनि दुर्घटनाको जोखिम छ । यो पुल साढे तीन वर्षमा बनाइसक्ने गरी ३१ जेठ ०६८ मा ठेक्का सम्झौता भएको थियो ।

 

 

The post बलान नदीमा दुर्घटनाको जोखिम appeared first on Naya Patrika.

from Naya Patrika https://ift.tt/2xYm7xG