प्रदेश ५ मा छिट्टै जडिबुटी प्रशोधन केन्द्र सञ्चालनमा आउँछ : मन्त्री बराल

धन्वन्तरी जयन्ती तथा आरोग्य दिवस कार्यक्रम –

प्रदेश ५ का सामाजिक विकासमन्त्री सुदर्शन बरालले प्रदेशमा आयुर्वेदिक औषधी उत्पादन गर्ने बताएका छन् । लुम्बिनी अञ्चल आयुर्वेद औषधालय बुटवलले मंगलबार गरेको धन्वन्तरी जयन्ती तथा आरोग्य दिवस विशेष कार्यक्रममा बोल्दै मन्त्री बरालले यसै वर्षदेखि जडिबुटी प्रशोधन केन्द्र सञ्चालनमा ल्याउने गरी काम अगाडी बढाइएको बताए ।

नेपालमा रहेका बहुमुल्य जडिबुटी सस्तोमा विदेश गइरहेको अवस्थामा यहाँ जडिबुटी प्रशोधन केन्द्र सञ्चालनमा ल्याएपछि बहुमुल्य औषधी उत्पादनको काम अगाडी बढ्ने मन्त्री बरालले बताए ।

प्रदेश सरकार आयुर्वेद क्षेत्रलाई व्यवस्थित गर्न लागि परेको भन्दै स्वस्थ्य क्षेत्रका विकृतिहरुका विरुद्धमा कदम चाल्ने उनको भनाइ छ । सडकमा बसेर अदक्ष स्वस्थ्यकर्मीहरुले औषधी विक्रि गर्ने गरेको पाइएको भन्दै त्यस्ता कामलाई रोकिने उनले बताए ।

कार्यक्रममा बोल्दै सामाजिक विकास मन्त्रालयका सचिव कृष्ण ज्ञवालीले आयुर्वेद औषधी उत्पादन गर्न प्राकृतिक हिसाबले अत्यन्तै सुन्दर देश नेपालमा धेरै संभावना रहेको चर्चा गर्दै सबै क्षेत्र मिलेर काम गर्नुपर्ने बताए ।

मन्त्रालयका स्वस्थ्य महाशाखाका प्रमुख डाक्टर उमाशंकर चौधरीले मन्त्रालयले अगाडी सारेका विभिन्न कार्यक्रमका बारेमा चर्चा गरेका थिए । अस्पतालका निमित्त प्रमुख कविराज गणेश प्रसाद सापकोटाले पूर्वाधार र जनशक्ति अभावमा स्तरीय सेवा दिन आफूहरु लागि परेको बताए । उनले अस्पतालको स्तरवृद्धि तथा जनशक्ति थप गर्नुपर्ने अवस्था रहेको बताए ।

अस्पतालका स्वस्थ्य जीवन तथा योग कार्यक्रमका संयोजक वैद्य विष्णुहरी आचार्यले जीवन शैली व्यवस्थित गर्न सकिएमा रोग लाग्नबाट बचिने भएकाले यसबारेमा सबै सचेत हुनुपर्ने धारणा राखेका छन् ।

योग, आयुर्वेद र प्राकृतिक चिकित्साभित्र जीवनशैली परिवर्तनका आधारहरु रहेको भन्दै स्वस्थ्य जीवनका लागि खानपिन देखि योगको महत्व बढी रहेको उनले बताए ।

औषधी व्यवसायी संघ लुम्बिनीका अध्यक्ष शिव ज्ञवालीले जडीबुटीमा नेपाल धनी भएपनि औषधी उत्पादकहरुले विदेशबाट औषधी मगाउनुपर्ने अवस्था रहेको भन्दै सरकारी निकायले यहाँका जडीवुटी सदुपयोग गर्ने कार्यक्रम ल्याएमा धेरै सहज हुने बताए ।

कार्यक्रममा बुटवल उपमहानगरपालिकाका उपमेयर गुमादेवि आचार्य, वडा नं. ११ का वडाअध्यक्ष रामचन्द्र क्षेत्रीलगायतले स्वस्थ्य क्षेत्रका बारेमा चर्चा गरेका थिए । कार्यक्रममा चेतनामुलक देउसीभैलो समेत खेलिएको थियो ।

The post प्रदेश ५ मा छिट्टै जडिबुटी प्रशोधन केन्द्र सञ्चालनमा आउँछ : मन्त्री बराल appeared first on Naya Patrika.

from Naya Patrika https://ift.tt/2Qokt0j