पुष्प व्यवसायमा रमाउँदै हुमा : तिहार लागेसँगै फूल टिप्न भ्याइ नभ्याई

तिहारलाई फूल र बत्तिको पर्वका रुपमा पनि मनाइन्छ । तिहारमा माला बनाउन, पूजा गर्न र घर सजाउन सयपत्री फूलको प्रयोग हुने गरेको छ । बेसीशहर नगरपालिका २ बोहोराबेसीमा पुष्प व्यावसाय गरेकी हुमा गुरुङलाई यतिबेला घाम उदाएदेखि अस्ताएसम्म फूलबारीमामा काम गर्न भ्याईनभ्याई छ ।

 

‘फूलको हेरचाहमै दिन बित्छ, बिहान उठेदेखि नै फूलमा पानी हाल्यो, गोडमेल गर्यो, समय बितेको पत्तै नहुने उनले बताइन् । हुमा पाँच वर्षदेखि पुष्प व्यवसायमा रमाएकी छिन् । जिल्लामा एक मात्र पुष्प व्यावसाय शुरु गरेकी हुमाले जिल्लाको पुष्प व्यवसायलाई सम्भावनाको पेशाको रुपमा चिनाएकी छन् ।

गुरुङले बेसीशहर–२ बोहोराबेसीमा साढे चार रोपनी जमिनमा मौसमी तथा सदाबहार पुष्प नर्सरी व्यवसाय शुरु गरेकी हुन् । गुरुङले दुई रोपनी जग्गामा सयपत्री जातको फूलको खेती गरेकी छन् साढे दुई रोपनी जग्गामा बिभिन्न जातका फुल रोपेकी छन् ।

७ लाखको सयपत्रीको विरुवा विक्री
तीन महिनामा नै फुल्ने सयपत्रीका विरुवाको विक्रीबाट हुमाले ७ लाख रुपैयाँ आम्दानी गरेकी छन् । फूलको बिउ भने थाइल्यान्डबाट ल्याएको उनले बताइन् । ‘पहिले थोरै काम चलाउन बारीको कान्लातिर मात्र रोप्ने गरेको थिएँ, ‘चार वर्षबाट व्यावसायिक रूपमै खेती सुरु गरेकी हुँ ।’

बिउ केही महँगो भए पनि फूल राम्रो भएपछि जाँगर चल्ने भन्दै उनले फूलखेतीका लागि ठूलो मिहिनेत पनि आवश्यक नरहेको बताइन् । ‘नर्सरीमा एउटा बिरुवाको २० देखि ४० रुपैयाँजति पर्छ,’ उनले भनिन्, ‘मैले १ हजार बोट लगाएको छु, एउटा बोटबाट २ देखि ३ सय रुपैयाँसम्म कमाइ हुन्छ ।’ यसवर्षको तिहारमा १ लाखको फूल विक्री हुने उनको अनुमान छ ।

फूलले बजार पाउँदा हर्षित
आफ्नो नर्सरीमा उत्पादन भएको फुलले बजार पाउँदा उनी निकै खुसी छिन् । फूल राम्रो देखेर जिल्लामा आयोजना हुने जुनसुकै कार्यक्रममा पनि फूलका लागि निरन्तर फोन आउने गरेको उनी बताउँछिन् ।

उनले भनीन् , ‘यस वर्ष ८ रोपनी जग्गामा फूल खेती गरेकी छु ।’ गुरुङ भन्छीन् ‘घरको बार्दली तथा बगैंचामा फूल रोप्न जिल्ला बाहिरबाट विरुवा किन्न बाध्य भएका उपभोक्ता जिल्लामै पुष्प नर्सरी स्थापना भएपछि खुसी भएका छन् ।

मासिक दुई देखि ३ लाख आम्दानी
नर्सरीमा काम गर्दा आफुलाई सन्तुष्टि मिलेको उनले बताइन् । ३८ वर्षकी हुमा सिप विकास प्रतिष्ठान –गैरीक्याम्पसको आकर्षक जागिर छोडेर पुष्प व्यावयसायमा होमिएकी हुन् । गुरुङले पुष्प व्यावसायबाटै मासिक दुई देखि ३ लाख कमाउँछिन् ।

सार्वजनिक कार्यक्रममा खादा भन्दा मालाको माग बढ्दो छ’ हुमाले भनिन्, ‘उत्पादनले बजार नपाउने चिन्ता छैन, मागअनुसार पुराउनै गाह्रो छ ।

बिभिन्न फूल र फलफूलका बिरुवा तयार गर्ने उद्देश्यका साथ सञ्चालित उनको पुष्प नर्सरी व्यवसायले अहिले फड्को मारेको छ । उनले नर्सरीमा बिरुवा तयार पार्नुका साथै फूल खेती पनि गर्दै आएकी छन्।

दुईवटा ग्रिनहाउस नर्सरीमा सयपत्री, बहुवर्षे जिरानियम, जर्बेरा, पिटुमिया, डायन्थल्स, बेगनवेलिया, गुलाव, धुपी, अशोका, क्रोटन, क्रिसमस ट्रि लागयतका फूलका बिरुवा उत्पादन र बिक्री भइरहेको छ । यस्तै हाईव्रिड जातका कागती, अम्बा, आँप, लिची, एभोगार्ड, सुन्तला मुन्तला छन् भने एजोलिया, कार्नेसन, मिमोलस जस्ता सदाबहार फूलका विरुवा नर्सरीबाट बिक्री हुने गरेको गुरुङले बताइन् ।

The post पुष्प व्यवसायमा रमाउँदै हुमा : तिहार लागेसँगै फूल टिप्न भ्याइ नभ्याई appeared first on Naya Patrika.

from Naya Patrika https://ift.tt/2qxn256