उपाधिका लागि पोखरा र चितवन भिड्दै

पहिलो संस्करणको पोखरा प्रिमियर लिग (पिपिएल) टी–२० क्रिकेट प्रतियोगिताको उपाधि छिनेफानो मंगलबार हुँदै छ । उपाधिका लागि घरेलु टोली पोखरा पल्टनले पोखरा क्रिकेट रंगशालामा चितवन राइनोजको सामना गर्नेछ । पोखराको कप्तानी शरद भेषवाकर तथा चितवनको नेतृत्व राष्ट्रिय टोलीका कप्तान पारस खड्काले गरिरहेका छन् । उपाधि विजेताले २७ लाख र उपविजेताले १० लाख पाउनेछन् ।

लगातार चार खेलमा जित
अक्सनमा चितवन निकै बलियो टोली देखिएको थियो । कप्तान पारसले राम्रा खेलाडी अनुबन्धित गर्दैै उपाधिमाथि दाबेदारी प्रस्तुत गरेका थिए । लिगको पहिलो दुई खेलमै हारको सामना गरेपछि चितवनको उपाधि यात्रा कठिन बन्यो । त्यसपछि लगातार चार खेलमा जित निकाल्दै चितवनले उपाधि यात्रा पक्का गर्‍यो । लिग चरणको अन्तिम खेलमा चितवनले विराटनगरलाई हराउँदै प्लेअफ स्थान पक्का गर्‍यो । प्लेअफमा चितवनले राष्ट्रिय टोलीका उपकप्तान ज्ञानेन्द्र मल्लको नेतृत्वमा रहेको हुलास काठमाडौंमाथि ६ विकेटको जित निकाल्दै फाइनलमा पोखरासँगको भेट निश्चित गर्‍यो । चितवनलाई पोखराविरुद्ध बदला लिने अवसरसमेत छ ।

अन्तिम खेलमा भाग्य
घरेलु टोली पोखराले सुरुवाती खेलमा उत्कृष्ट प्रदर्शन गर्‍यो । लिग चरणको अन्तिम खेलमा काठमाडौंमाथि रोमाञ्चक जित निकाल्नुअघि पोखराको अवस्था कमजोर थियो । सुरुमा प्लेअफमा स्थान सुरक्षित गर्न पोखराले काठमाडौंमाथि जित निकाल्नुपर्ने समीकरण बन्यो । तर, पोखराले अन्तिम खेलमा काठमाडौंमाथि एकपक्षीय जित मात्र निकालेन, रनरेटमा समेत सुधार गरी सीधै फाइनल स्थान पक्का पार्‍यो ।

मानसिक रूपमा तयार
सराङकोटमा सोमबार आयोजित पत्रकार सम्मेलनमा पोखराका शरदले फाइनलका लागि शारीरिक र मानसिक रूपमा तयार रहेको बताए । ‘हामी नतिजाभन्दा पनि उत्कृष्ट खेल देखाउने पक्षमा केन्द्रित हुन्छौँ,’ शरदले भने, ‘उपाधि जित्ने लक्ष्यसहित आएका थियौँ, अब हामी नजिकसमेत पुगेका छाैँ ।’ चितवनका कप्तान पारसले फाइनलसम्म धेरै मिहिनेत गरेको बताए । ‘फाइनलिस्टका टोली राम्रा छन्,’ उनले भने ।

The post उपाधिका लागि पोखरा र चितवन भिड्दै appeared first on Naya Patrika.

from Naya Patrika https://ift.tt/2qwSFLY