सिप्रदीले ल्यायो टाटा नेक्सन क्राज

टाटा मोर्टसको नेपालस्थित आधिकारिक विक्रेता सिप्रदी ट्रेडिङ प्राइभेट लिमिटेडले नेक्सन क्राजको बजारमा बिक्री सुरु गरेको छ । कम्पनीले टाटाले नेक्सनको सफलतापछि लमिटेड एडिसनको रूपमा नेक्सन क्राजको उत्पादन गरेको हो ।

गाडीको बिक्री सुरु गर्दै टाटा मोटर्सको प्यासेन्जर भेइकल युनिटसम्बन्धी अन्तर्राष्ट्रिय व्यापार प्रमुख सुजन रोयले भने, ‘नेक्सनले नेपाली बजारमा सर्वाधिक बिक्री हुने कम्प्याक्ट एसयुभीको रूपमा आफ्नो बेग्लै पहिचान बनाउन सफल भइसकेको छ । यसै परिपे्रक्षमा हामीले मुख्यतः सक्रिय र साहसिक जीवनशैली रुचाउने नेपाली ग्राहकको आवश्यकता र मागलाई सम्बोधन गर्न क्राज ल्याएका हौँ ।’

विशेषता
मल्टिड्राइभ मोडको विशेषतायुक्त यो गाडी सहरको व्यस्त सडकदेखि लिएर राजमार्गमा समेत अत्यन्त सरल र रोमाञ्चक ढंगले चलाउन सकिने कम्पनीले जनाएको छ । २ सय ९ मिलिमिटरको ग्राउन्ड क्लियरेन्सले नेक्सन क्राजलाई अरूभन्दा बढी सुरक्षित र आरामदायी बनाएको छ । त्यस्तै, चार स्पिकरको इन्फोटेन्मेन्ट, अटोमेटिक क्लाइमेट कन्ट्रोल, रिभर्स पार्किङ सेन्सरजस्ता अन्य विशेषता यसमा रहेको छ । यसमा स्पोर्टी सोनिक सिल्भर रंगको डुअल टोन रुफ रहेको छ । त्यस्तै यसमा १ सय १० पिएस शक्ति र ६ म्यानुअल गेयर रहेका छन् ।

ग्लोबल एनक्यापको परीक्षणमा उक्त गाडी सबैभन्दा सुरक्षित एसयुभी प्रमाणित भएको दाबी कम्पनीले गरेको छ । त्यस्तै,यसले क्र्यास टेस्टमा फोर स्टार पाएको छ । यसमा इको, सिटी र स्पोर्ट गरी तीन मल्टी ड्राइभ मोड रहेको छ ।

मूल्य
कालो र हरियो रङको सम्मिश्रण भएको नेक्सन क्राज १२०० पे्रटोल र १५०० सिसी इन्जिन डिजेल क्षमतामा उपलब्ध छ । उक्त गाडी क्राज र क्राज प्लस गरी दुई भ्यारिएन्ट रहेका छन् । डिजेलका लागि ४३ लाख ८५ हजार रुपैयाँ र पेट्रोलका लागि ३९ लाख ९५ हजार रुपैयाँ न्यूनतम मूल्य तोकिएको छ ।

The post सिप्रदीले ल्यायो टाटा नेक्सन क्राज appeared first on Naya Patrika.

from Naya Patrika https://ift.tt/2QQPdHK