१७ वर्षपछि जिम्बावेले विदेशी भूमिमा निकाल्यो जित

जिम्बावेले बंगलादेशमा जारी दुई खेलको टेस्ट सिरिजमा घरेलु टोलीविरुद्ध पहिलो जित निकालेको छ । जिम्बावेले १७ वर्षपछि विदेशी भूमिमा टेस्ट क्रिकेटमा जित निकालेको हो । मंगलबार भएको खेलमा १ सय ५१ रनको जित निकालेको जिम्बावेको टेस्ट क्रिकेटमा यो ५ वर्षपछिको जित हो । यसअघि जिम्बावेले आफ्नो घरेलु मैदानमा २०१३ मा पाकिस्तानलाई पराजित गरेको थियो । विदेशी भूमिमा भने २००१ मा जिम्बावेले बंगलादेशलाई नै चटगाउँमा पराजित गरेको थियो ।

जिम्बावेले पहिलो इनिङमा २ सय ८२ र दोस्रोमा १ सय ८१ रन बनाएको थियो । बंगलादेश पहिलो इनिङमा १ सय ४३ र दोस्रो इनिङमा १ सय ६९ रनमा समेटियो । जिम्बावेले दिएको ३ सय २१ रनको लक्ष्य पछ्याएको बंगलादेश ३६.१ ओभरमा १ सय ६९ रन बनाउँदा अलआउट भयो । जिम्बावेका लागि लेगस्पिनर मावुताले २१ रन दिएर सर्वाधिक ४ विकेट लिए भने अफस्पिनर सिकंदर रजाले ४१ रन खर्चिएर ३ विकेट लिए ।

बंगलादेशका तजमुल इस्लामले लिए ११ विकेट
खेलमा सर्वाधिक रन जिम्बावेका सिन विम्सिनले बनाए । उनले पहिलो इनिङमा ८८ रन बनाए । अर्को इनिङमा बंगलादेशका लागि इमरुल कायसले ४३ रन बनाए । खेलमा बंगलादेशका तजमुल इस्लामले सर्वाधिक विकेट लिए । उनले २ इनिङमा गरी ११ विकेट लिए । जिम्बावेका लागि दुवै इनिङमा गरेर सर्वाधिक विकेट रजाले लिए । उनले ६ विकेट लिएका थिए ।

The post १७ वर्षपछि जिम्बावेले विदेशी भूमिमा निकाल्यो जित appeared first on Naya Patrika.

from Naya Patrika https://ift.tt/2RFanIN