प्रथम नायिका चलचित्र निर्माणमा

काठमाडौं। २०२२ सालमा पहिलो नेपाली चलचित्रमा अनुबन्धित हुँदा अभिनेत्री भुवन चन्द थापालाई चलचित्रका बारेमा त्यति धेरै जानकारी थिएन । नेपालमा पहिलोपटक चलचित्र बन्ने भयो । त्यतिबेला उनी भैरवबहादुर थापाको भैरव दलमा कुशल नृत्य कलाकार थिइन् । केही नाटकमा पनि काम गरिसकेकी थिइन् ।

आमाका लागि नायिकाका रूपमा अडिसन दिइन् । मुख्य नायिकामा चयन भइन् । नेपालमै पहिलोपटक सेल्युलोइटक क्यामेराका अघि उभिएर नायिका भएर अभिनय गरिन् । चलचित्र आमा रिलिज भयो । आमाबाट नेपालको प्रथम नायिकाका रूपमा इतिहासमा भुवन चन्दको नाम लेखियो ।

यसरी पहिलो चलचित्र खेलेको ५३ वर्षपछि यतिबेला यी अभिनेत्री ७ दशकको संघारमा छिन् । उनी यतिबेला निर्माताका रूपमा चलचित्र क्षेत्रमा आउँदै छिन् । भुवनको भनाइमा उनले आमापछि दर्जनांै चलचित्रमा अभिनेत्री र चरित्र अभिनेत्री भएर अभिनय गरिन्  ।  थुप्रै चलचित्रबाट उत्कृष्ट अभिनयको अवार्ड पनि जितिन् । आफूले चाहेको जस्तो चलचित्र बनाउने उनको चाहना थियो । त्यो चाहना यी अभिनेत्रीले बल्ल पूरा गर्दै छिन् ।

यी अभिनेत्रीले चलचित्र ‘साइनो’ निर्माण थालेकी छन् । यो चलचित्रमा उनी अभिनेत्री नभएर निर्माताका रूपमा आउँदै छिन् । भुवनको भनाइमा उनी जोडिएको क्षेत्र भनेकै चलचित्र हो । चलचित्रको कामबाहेक आफूले अरू काम नजानेकै कारण पनि उनी यतिबेला निर्माताका रूपमा चलचित्रमा आएकी हुन् ।

उनका पति माइकल चन्द रेडियो नेपालका चर्चित समाचार वाचक हुन् । चलचित्र निर्मातामा उनलाई श्रीमान्को पनि त्यत्तिकै साथ छ । भुवनको भनाइमा उनी यसअघि सांस्कृतिक संस्थानको जागिरसहित पारिवारिक र चलचित्रको कामले फुर्सदमा थिइनन् । अवकाशपछि उनी र श्रीमान् दुवै फुर्सदमा छन् । फुर्सदका कारण पनि आफू चलचित्र निर्माणमा आएको भुवन चन्दले बताएकी छन् ।

भुवन चन्दसँग चलचित्र आमामा बसुन्धरा भुसाल र चैत्यदेवी सिंहले पनि मुख्य भूमिका निर्वाह गरेका थिए । पहिलो चलचित्रमा बाँधिएको त्यो मित्रतालाई निरन्तता दिँदै आफैंले निर्माण गर्न लागेको चलचित्र साइनोमा समेत भुवनले चैत्यदेवी र बसुन्धरालाई महŒवपूर्ण भूमिकामा समेटेकी छन् ।

३ मंसिरबाट काभ्रेदेखि छायांकन सुरु हुने चलचित्र साइनोको काठमाडौंमा आइतबार अपराह्न भुवनले निर्माण घोषणा पनि गरिन् ।

पहिलो चलचित्रकी अभिनेत्रीले त्यही समयअनुसारकै चलचित्र बनाउने कि फरक हुन्छ भन्ने जिज्ञासामा भुवनले भनिन्, ‘गुन्यु चोली र फरिया लगाउने मेरो समय थियो र अहिले त्यस्तो सिनेमा चल्दैन त्यसैले अहिलेको कथा, परिवेश र वेशभूषाअनुसारको पूर्ण व्यावसायिक र अहिलेका पुस्ताले रुचाउने चलचित्र निर्माण गर्दै छु । पहिलो चलचित्र आमाको नायिका भए पनि समयअनुसार आफू फेरिँदै यहाँसम्म आएकाले अहिलेको समयलाई प्रतिनिधित्व गर्ने चलचित्र नै बनाउने पनि यी अभिनेत्रीले बताइन् ।

भुवनको साइनोलाई कलाकार रमेश थापाले निर्देशन गर्दै छन् । करिब दुई वर्षको तयारीपछि आफू निर्माणमा उत्रिन लागेको पनि प्रथम अभिनेत्री भुवनले बताइन् । जसमा उनले कलाकारका रूपमा भरतबाट आएका नव अभिनेता राजकुमारसँगै निता ढुंगाना, मिरुना मगर, मदनदास श्रेष्ठ, शिखा तामाङ, राजा राजेन्द्र पोखरेल, रामेश्वर बुर्लाकोटी, विशाल पहाडी, रोयदीप श्रेष्ठलगायतलाई राखेकी छन् ।

भुवनको भनाइमा यो चलचित्र पूर्ण व्यावसायिक हुनेछ । चलचित्रले दर्शकलाई मनोरञ्जन दिनेछ । छायांकन सकेपछि उनले चलचित्रको प्रदर्शन तिथि घोषणा गर्नेछिन् । यसरी प्रथम नायिकाका रूपमा परिचित भुवनले अब आफूलाई चलचित्र निर्माताका रूपमा पनि परिचित गर्ने भएकी छन् ।

 

 

 

from Rajdhani Daily https://ift.tt/2DwRmof