विवाहपञ्चमी हेर्न ओइरिए श्रद्धालु

नेपाल–भारत सीमानाकामा चहलपहल, श्रद्धालुको सेवामा खटिए स्थानीय

विवाहपञ्चमी मेला भर्न आएका साधु सन्त तथा श्रद्धालुहरूले नेपाल–भारत सीमा नाका भरिभराउ देखिएको छ । भारतको युपी, विहारलगायतका राज्यबाट विवाहपञ्चमी मेला भर्न आइरहेका छन् । जसका कारण मुख्य नाका जलेश्वरको मलिवारामा सवारीसाधनसहितको श्रद्धालुको उपस्थिति बाक्लो देखिएको हो ।

सोमबार घोडा र रथसहितका साधुहरूको टोली धनुषाको जटही नाकाबाट प्रवेश गरे पनि अन्य साधु साबिककै बाटो हुँदै जनकपुर प्रवेश गरिरहेका छन् । सीमानाकामा श्रद्धालुलाई लक्षित गरी अस्थायी शौचालय, स्वास्थ्य शिविर तथा अन्य व्यवस्था मिलाइएको सशस्त्र प्रहरी बलको १३ नम्बर गुल्मपति डिएसपी राजेश्वर पोखरेलले जानकारी दिए ।

सीमामा सुरक्षा मजबुत
सीमानाकामा सुरक्षा व्यवस्था चुस्त पारिएको पनि उनले बताए । परम्परागत पौराणिक मार्ग रहेको भिठामोड र मटिहानीमा विभिन्न पन्डाल, प्राथमिक उपचार शिविर साथै सामुदायिक प्रहरीका युनिटले उनीहरूको सहयोगमा जुटिरहेका छन् । मंगलबार दिउँसो १ बजेसम्म ७ सयभन्दा बढी ठूला तथा साना सवारीसाधन भारतीय नाकाबाट नेपाल प्रवेश गरेको भन्सार कार्यालय जलेश्वर मलिवाराले जनाएको छ ।

ठाउँ–ठाउँमा  भोजनको व्यवस्था
मेला भर्न आउँदै गरेका श्रद्धालु मटिहानी स्थान र जलेश्वरनाथ महादेवसमेतको दर्शन गर्दै पैदल तथा सवारीसाधनमा अगाडि बढिरहेका छन् । उनीहरूको सुविधाका लागि पिपरा गाउँपालिका– ५ मा सहोडवास्थित विवाह पञ्चमी समिति एवं स्थानीयवासीले निःशुल्क भोजन, स्वास्थ्य शिविर, रात्रिवाससँगै विभिन्न सांस्कृतिक कार्यक्रमको व्यवस्था
गरेको छ ।

शौचालय अपुग हुँदा समस्या
श्रद्धालुलाई लक्षित गरेर बनाइएका शौचालय न्यून हुँदा समस्या देखिएको छ । स्थानीय निकाय र सुरक्षाकर्मीको समन्वयमा मलिवारामै अस्थायी शौचालय निर्माण भए पनि श्रद्धालुको संख्या ठूलो रहेकाले न्यून हुन पुगेको हो ।

सीमानाकामा यात्रीहरूको सहजताका लागि प्रहरीको बाक्लो उपस्थिति छ भने गत वर्षहरूमा भारतीय नम्बरका सवारीसाधनबाट अनधिकृत रूपमा रकम उठाउने प्रवृत्ति यस वर्ष धेरै नियन्त्रणमा देखिएको छ । सीमा प्रहरी कार्यालय मलिवाराका इन्चार्ज सइ रवीन्द्र सिंहले सीमानाकामा प्रहरीले सुरक्षासँगै यात्रीको सुविधाका लागि सवारीसाधन व्यवस्थापनदेखि अन्य विभिन्न सेवा दिइरहेको बताए ।

The post विवाहपञ्चमी हेर्न ओइरिए श्रद्धालु appeared first on Naya Patrika.

from Naya Patrika https://ift.tt/2EjNaIy