एउटै गाउँमा चार करोडका सुन्तला

परम्परागत खेती छाडेर पाखोबारीमा व्यावसायिक रूपमा सुन्तला रोपेका तनहुँको शुक्लागण्डकी नगरपालिका–११ नाम्सिकोटका किसानले यो वर्ष चार करोडको सुन्तला बिक्री गरेका छन् । गाउँका हरेक किसानले कम्तीमा तीनदेखि २५ लाखसम्मको सुन्तला बिक्री गरेको स्थानीय कमल महतले बताए । ‘गत वर्ष करिब तीन करोडको सुन्तला बिक्री गरेका किसानले यस वर्ष सुन्तला राम्रो उत्पादन भएकाले झन्डै एक करोड बढी आम्दानी गरेका छन् ।’ उनले भने ।

शुक्लागण्डकी नगरपालिका–११ स्थित नाम्सिकोटबाट यो वर्ष मात्रै चार करोड रुपयाँको सुन्तला बिक्री भएको हो । एउटै गाउँबाट करिब चार करोडबराबरको सुन्तला बिक्री भएपछि उनीहरू उत्साहित भएका छन् । ९५ घरपरिवार रहेको यस गाउँका अधिकांशको सुन्तला बगान छ । शुक्लागण्डकी नगरपालिकाका मेयर किसान गुरुङले सुन्तलाको पकेट क्षेत्र मानिएको नाम्सिकोटमा सुन्तलाले राम्रो आम्दानी दिइरहेको बताए । ‘किसानहरू सुन्तला व्यवसायबाट राम्रो आम्दानी हुन थालेपछि सन्तुष्ट छन्,’ उनले भने ।

 

 

The post एउटै गाउँमा चार करोडका सुन्तला appeared first on Naya Patrika.

from Naya Patrika https://ift.tt/2QONXba