पौडेलले माने गच्छदार आजै उपसभापति

कांग्रेस सभापति शेरबहादुर देउवाले विधानको बाधा अड्काउ फुकाउको माध्यमबाट विजयकुमार गच्छदारलाई उपसभापति बनाउने तयारी गरेका छन् । आजै बस्ने केन्द्रीय समितिबाट गच्छदारलाई अनुमोदन गर्ने गरी देउवाले तयारीलाई अघि बढाएको देउवाका स्वकीय सचिव भानु देउवाले जानकारी दिए ।

‘एक वर्ष अघि नै फोरम लोकतान्त्रिकबाट कांग्रेसमा आउनुभएका गच्छदारलाई उपसभापति बनाउने तयारी भएको हो’ देउवाले भने, ‘आज केन्द्रीय समितिको बैठक अघि सभापतिले रामचन्द्र दाइसहितका पदाधिकारीसँग छलफल गरेपछि बाधा अड्काउ फुकाउको माध्यमबाटै आजै गच्छदारलाई उपसभापति बनाउनु हुन्छ ।’ आज दिउँसो १ बजे बस्नेगरी कांग्रेस केन्द्रीय समितिको बैठक बोलाइएको छ । बैठकमा गच्छदारको विषयसहित महासमिति बैठक सार्ने र नेविसंघको महाधिवेशनबारे पार्टीले एउटा धारणा तय गर्दैछ ।

तर, पौडेलसहितका नेताहरुले विधान संसोधन मस्यौदा समितिले विधानको मस्यौदा गर्दै गर्दा अहिले बाधा अड्काउ फुकाउको माध्यमबाट गच्छदारलाई उपसभापति बनाउँदा राम्रो सन्देश नजाने तर्क गरिरहेको सभापति देउवा निकटका एक नेताले जानकारी दिए ।

‘हाम्रो विधानमा एउटा सभापति हुने धारा निलम्बन गरेर दुईवटा उपसभापति बनाउने गरी बाधा अड्काउ फुकाउबाट फुकाउनुपर्ने हुन्छ’ ती नेताले भने, ‘यसलाई महासमितिले अनुमोदन गरेपछि नयाँ व्यवस्था विधानको हिस्सा हुन्छ । तर, नेताहरुबीच सहमति भयो भने मात्रै तत्काल गच्छदार उपसभापति बन्नुहुन्छ नत्र केही समय ढिला हुन सक्छ ।’
सभापतिले बाधा अड्काउ फुकाउको माध्यमबाट गच्छदरलाई उपभसापति बनाएको घोषणा गरेपछि आजै बस्ने केन्द्रीय समितिले त्यसलाई अनुमोदन गर्ने र अब बस्ने महासमितिले यसलाई विधानको हिस्सा बनाउने तयारी छ ।

अरु पदाधिकारी बढ्ने सम्भावना कम
कांग्रेसमा पछिल्ला केही दिनयता नेत रामचन्द्र पौडेल पक्षले सभापति, तीन उपसभापति, तीन महामन्त्री र तीन सहमहामन्त्री, एक कोषाध्यक्षको निर्वाचन गर्नेगरी पदाधिकारी थप गर्नुपर्ने दबाब विधान मस्यौदा समिति र पार्टी नेतृत्वमाथि बढारहेको छ । तर, सभापति शेरबहादुर देउवा सबै पदाधिकारी निर्वाचित गर्ने गरी पदाधिकारी थप गर्ने पक्षमा छैनन् ।

अरु नेतालाई व्यवस्थापन गर्न समिति बन्ने
गच्छदार तत्काल उपसभापति भए तत्कालिन फोरमबाट आएका अन्य नेतलाई व्यवस्थापन गर्नका लागि अर्को एउटा समिति बनाउने तयारी भएको सभापति देउवाका सहयोगी भानु देउवाले जानकारी दिए ।

एक महिना पर्खिनुपर्ने तर्क पनि
विधान मस्यौदा समितिले विधानलाई अन्तिम रुप दिंदै गरेको बेलाम बाधा अड्काउ फुकाउबाट गर्न नहुने र एक महासमितिसम्म एक महिना पर्खिनुपर्ने विषय पनि कांग्रेसमा उठेका छन् । ‘विधान बन्ने क्रममा अहिले नै बाधा अड्काउ फुकाउबाट अघि बढ्दा राम्रो सन्देश जाँदैन भन्नेहरु पनि हुनुहुन्छ’ एक नेता भन्छन्, ‘यसकारण यत्ति ढिला त भयो अब महासमितिसम्म एक महिना पर्खौ भन्नेहरु पनि छन् ।’ पहिलो संविधानसभाको निर्वाचन अघिसम्म कांग्रेसमैं सक्रिय रहेका गच्छदार त्यसपछि फोरम हुँदै लोकतान्त्रिक फोरमको अध्यक्ष बनेका थिए । एक वर्ष अघि गत निर्वाचनका बेला गच्छदार कांग्रेस प्रवेश गरेका थिए ।

The post पौडेलले माने गच्छदार आजै उपसभापति appeared first on Naya Patrika.

from Naya Patrika https://ift.tt/2Qlcv8f