ऊर्जामा दिइने अनुदान राष्ट्रिय वाणिज्य बैंकमार्फत

राष्ट्रिय वाणिज्य बैंकले ‘इनर्जी इफिसिएन्सी प्रोग्राम नेपाल’ आयोजना कार्यान्वयनका लागि प्रोजेक्ट एक्जिक्युटिङ एजेन्सीका रूपमा काम गर्ने भएको छ । बैंकले नेपाल सरकार र जर्मन सरकारबीच भएको नेपालको औद्योगिक तथा व्यापारिक क्षेत्रमा मितव्ययी तथा प्रभावकारी ऊर्जा बचत गर्ने सम्झौताबमोजिम प्रोजेक्ट एक्जिक्युटिङ एजेन्सीको काम गर्ने भएको हो ।

आयोजनाअन्तर्गत नेपालमा सञ्चालित ठूला, साना तथा मझौला उद्योग र फर्महरूलाई मितव्ययी तथा प्रभावकारी ऊर्जा बचत हुने गरी यन्त्र उपकरण जडान गर्दा अनुदान रकम प्रदान गरिनेछ । जर्मन सहायताबाट प्राप्त हुने रकमबाट लागतको १५ देखि ३० प्रतिशतसम्म अनुदान रकम राष्ट्रिय वाणिज्य बैंकमार्फत उपलव्ध गराइने बैंकले जनाएको छ । यस आयोजनाअन्तर्गत कुनै एक इकाइले न्यूनतम १० लाखदेखि अधिकतम १ करोड रुपैयाँसम्मको लागत लाग्ने यन्त्र उपकरणको जडानमा सहायता रकमका लागि दरखास्त दिन पाइनेछ ।

यन्त्र उपकरण जडानका लागि राष्ट्रिय वाणिज्य बैंकलगायत अन्य कुनै वाणिज्य बैंकबाट ऋण लिनेगरी यस आयोजनाको सहयोगसमेत लिन इच्छुक इकाइका लागि सम्बन्धित वाणिज्य बैंकमार्फत दरखास्त दिनुपर्ने र यस्तो अवस्थामा माथि उल्लेख गरेभन्दा थप ५ प्रतिशत सहायता रकम उपलव्ध गराइने जनाइएको छ ।

 

 

The post ऊर्जामा दिइने अनुदान राष्ट्रिय वाणिज्य बैंकमार्फत appeared first on Naya Patrika.

from Naya Patrika https://ift.tt/2TtxZBM