जोगवनी–किमाथाङ्का सडक अझै अघि बढेन

भिर फुटाउने जिम्मा सेनालाई दिने तयारी अन्तिम चरणमा

पूर्वीपहाडी जिल्ला संखुवासभामा निर्माणधीन जोगवनी—किमाथाङ्का सडकखण्डका भिर फुुटाउने जिम्मा नेपाली सेनालाई दिइने भएको छ । दुई ठूला छिमेकी मुलुक भारत–चीन जोड्ने त्रिदेशीय लिंकको रूपमा जोगवनी—किमाथाङ्का सडकखण्डअन्तर्गतका भिर फुटाउने जिम्मा सेनाले पाउन लागेको छ ।

उत्तर–दक्षिण (कोसी सडक) आयोजना प्रमुख पशुपति ज्ञवालीका अनुसार चीन र भारत जोड्ने सबैभन्दा छोटो यो सडकको निर्माण कार्यले गति लिन नसकेपछि ठूला चट्टान रहेको भिर फुटाउने जिम्मा नेपाली सेनालाई दिने तयारी भएको हो । ‘त्यसक्षेत्रमा ठूला–ठूला चट्टान छन् । त्यसैले सडक निर्माणको काम नेपाली सेनालाई दिने तयारी भएको हो,’ आयोजना प्रमुख ज्ञवालीले भने, ‘प्रक्रिया अन्तिम चरणमा पुगेको छ ।’

१५ किलोमिटरमा ठूला चट्टान
किमाथाङ्का नाका जोड्न २३ किलोमिटर मात्रै बाँकी छ । त्यसखण्डकोे १५ किलोमिटर क्षेत्रमा ठूला चट्टान धेरै भेटिएकाले निर्माण कार्य अगाडि बढ्न सकेको छैन । सोही क्षेत्रसेनालाई दिन लागिएको ज्ञवालीको भनाइ छ । ‘शंखे र महाभीरको चट्टान असाध्यै ठूलो भएकाले ट्रयाक खोल्न समस्या भइरहेको छ । विस्फोटक पदार्थको प्रयोग गर्नुपर्ने आवश्यकता देखिएकाले सेनालाई दिन लागिएको हो,’ आयोजना प्रमुख पशुपति ज्ञवालीले भने ।

यसै वर्ष गाडी पु-याउने लक्ष्य
जोगवनी—किमाथाङ्का सडकमा ट्रयाक खोली यसै वर्ष नाकासम्म गाडी पु-याउने लक्ष्य सरकारको छ । समय कम रहेकाले पनि सो खण्ड सेनाको जिम्मामा दिन लागिएको प्रतिनिधिसभा सदस्य राजेन्द्र गौतमले बताए । ‘विस्फोटक पदार्थ खरिद गरेर बंकर निर्माण गरी भण्डारण गर्ने र भिरको चट्टान फुटाउने प्रक्रियाका लागि नेपाली सेनासँग कुरा भएको छ । सो प्रक्रिया अन्तिम चरणमा पुगेको छ,’ सांसद गौतमले भने, ‘समयमा काम सम्पन्न गर्न सेनालाई दिनुको विकल्प छैन ।’

डेढ वर्षदेखि निर्माण ठप्प
यहाँ करिब डेढ वर्षदेखि निर्माण कार्य ठप्प छ । सिन्धुपाल्चोकबाट चीनको स्वाशासित क्षेत्र तिब्बत हुँदै डोजर र इन्धन ल्याएर किमाथाङ्काबाट १४ किलोमिटर ट्रयाक खोले पनि यतातर्फ ट्रयाक खोल्ने काम अघि बढ्न सकेको छैन । ठेक्का पाएको कान्छाराम एपेक्सले विभिन्न कारण देखाउँदै सडक निर्माण कार्य अगाडि बढ्न नसकेको जानकारी आयोजनालाई आएको आयोजना प्रमुखले जानकारी दिए ।

होलिकोप्टरबाट डोजर ल्याई काम
यता चेपुवा—हटिया–हुङहुङ हुँदै सडक ट्रयाक खोल्न हेलिकोप्टरबाट डोजर लगेर काम भइरहेको छ । चालू आर्थिक वर्ष ०७५/७६ का लागि संघीय सरकारबाट ४७ करोड रुपैयाँ बजेट आएको यो आयोजना निर्माणमा बजेटको अभाव नरहेको प्रमुख ज्ञवालीले जानकारी दिए । जोगवनी–मोरङको रानी हुँदै जोगवनीदेखी संखुवासभाको किमाथाङ्का नाका जोड्न कुल ३ सय ९० किलोमिटर रहेको छ । खाँदबारी–किमाथाङ्काको दूरी १ सय ६२ किलोमिटर रहेको छ ।

त्यसमध्ये १ सय ४४ किलोमिटर सडक ट्रयाक खोलिइसकेको छ । अब किमाथाङ्का नाका जोडिन २३ किलोमिटर मात्रै बाँकी रहेको आयोजनाका प्रमुख ज्ञवालीले जानकारी दिए । ०६५ सालमा खाँदबारीमा स्थापना भएको उत्तरदक्षिण (कोसी) सडक आयोजनाले खाँदबारीदेखि किमाथाङ्का नाकासम्मको सडकको मात्रै काम गर्ने गर्छ ।

भिर फोड्न विस्फोटक पदार्थ चाहिने
चेपुवा, छुमसुर घोङगोप्पा सडकखण्ड निर्माणका लागि विस्फोटक पदार्थ आवश्यक परेको हो । अत्यन्तै कडा चट्टानको भिर भएकाले यो १५ किलोमिटर सडकखण्डमा विस्फोट पदार्थ प्रयोग गरेर मात्रै अघि बढ्न सकिने उनको भनाइ छ । सिम्बुङ–हटियाखण्डको ट्रयाक खोल्ने, बरुण–सिम्बुङको रेखांकन विवाद, अलैँची तथा गुम्बाक्षेत्रमा देखिएको समस्या समाधान गरेर सडक निर्माणको काम अघि बढिसकेको उनले बताए । केही समयअगाडि यसक्षेत्रमा विवादका कारण सडक निर्माण कार्यले गति लिन सकेको थिएन ।

The post जोगवनी–किमाथाङ्का सडक अझै अघि बढेन appeared first on Naya Patrika.

from Naya Patrika https://ift.tt/2Kpisih