हुवावेकी कार्यकारी मेङ जमानतमा रिहा

क्यानडाको एक अदालतले हालै पक्राउ परेकी चीनको विशाल दूरसञ्चार कम्पनी हुवावेकी कार्यकारी प्रमुख मेङ वान्झाउलाई जमानतमा रिहा गरेको छ । मेङमाथिको अभियोगबारे सुनुवाइ गर्ने क्रममा बुधबार अदालतले उनलाई रिहा गरेको हो । अमेरिकी सरकारको अनुरोधमा क्यानडाको भ्यानकुभरमा दुई साताअघि मेङ पक्राउ परेकी थिइन् । उनको पक्राउसँगै चीन र अमेरिकाबीचको सम्बन्ध पुनः चिसिएको छ ।

७५ लाख डलर जमानत माग
अदालतले मेङसँग ७५ लाख अमेरिकी डलर जमानत माग गरेको छ । भ्यानकुभरमा उनका पति लिउ झाओझोङको निवासमा बस्न मेङलाई अदालतले अनुमति दिएको छ । उनको पासपोर्ट क्यानडेली सरकारलाई बुझाउन र विद्युतीय अनुगमन गर्न पनि अदालतले फैसला गरेको छ । अदालतको आदेशपछि अदालत परिसरमा भेला भएका मेङका समर्थकले खुसीयाली मनाएका थिए ।

चीनको विरोध
अदालतबाट भएको सर्तसहितको जमानतप्रति पनि चीनले आपत्ति जनाएको छ । दुई दिनअघि चीनस्थित क्यानडाका राजदूतलाई बोलाएर उनी रिहा नभए क्यानडाले नराम्रो परिणाम भोग्नुपर्ने चीनले चेतावनी दिएको थियो । चीनका लागि क्यानडाका राजदूत जोन म्याककालमलाई विदेश मन्त्रालयमा बोलाएर मेङ प्रकरणबारे प्रस्टीकरण लिइएको थियो । चीनले मेङको पक्राउलाई ‘ठूलो मूखर्ता’ बताएको छ । उनले कुनै पनि कानुन उल्लंघन नगरेको चीनले जोड दिँदै आएको छ । उनको बेतुकको पक्राउले मानवअधिकार र अन्तर्राष्ट्रिय कानुनको उपहास गरेको चीनले बताएको छ ।

मेङमाथिको आरोप

क्यानडाको सुप्रिम कोर्ट अफ ब्रिटिस कोलम्बियामा क्यानडेली अभियोजनकर्ताहरूले मेङले सन् २००९ देखि २०१४ सम्म इरानमाथिको प्रतिबन्ध छल्न हुवावेको स्काई डटकम प्रयोग गरेको बताएका छन् । उनले स्काई डटकमलाई सार्वजनिक रूपमा एउटा अलग कम्पनीको रूपमा गलत प्रतिनिधित्व गरेको पनि उनीहरूले बताएका छन् । मेङले षड्यन्त्रपूर्वक एकभन्दा बढी वित्तीय संस्थामा ठगी गरेको अभियोजनकर्ताले बताएका छन् ।

अमेरिकी आरोप
अमेरिकाले इरानमाथि लगाएका प्रतिबन्धहरूको चिनियाँ कम्पनी हुवावेले उल्लंघन गरेको अमेरिकाले आरोप लगाउँदै आएको छ । मेङलाई डिसेम्बर १ तारिखमा भ्यानकुभरमा प्रहरीले पक्राउ गरेको थियो । अमेरिकी अधिकारीहरूले मेङको गिरफ्तारी चीनसँगको व्यापार मुद्दासँग नजोडिएको बताएका छन् । हुवावे प्रविधिको क्षेत्रमा चीनको विश्वव्यापी पहुँच रहेको महत्वपूर्ण कम्पनी हो । तर, हुवावेले उपलब्ध गराएका कतिपय सेवामाथि अमेरिका, अस्ट्रेलिया, न्युजिल्यान्ड र बेलायतले सुरक्षाको कारण दर्साउँदै प्रतिबन्ध लगाएका छन् ।

 दोषी ठहर भए ३० वर्ष जेल सजाय
हुवावेका संस्थापककी छोरी मेङमाथि इरानविरुद्धका अमेरिकी प्रतिबन्धहरूलाई बेवास्ता गरेर व्यापारिक सम्बन्ध कायम राखेको र बैंकहरूलाई ढाँटेको आरोप लागेको छ । मेङ दोषी ठहरिए उनलाई ३० वर्षभन्दा बढी जेल सजाय हुन सक्नेछ । आगामी फेब्रुअरी ६ बाट मेङलाई अमेरिका सुपुर्दगी गर्ने प्रक्रिया सुरु हुने क्यानडेली अधिकारीहरूले बताएका छन् । तर, कानुनी जटिलताका कारण यो प्रक्रिया पूरा हुन महिनौँ लाग्न सक्ने बताइएको छ ।

The post हुवावेकी कार्यकारी मेङ जमानतमा रिहा appeared first on Naya Patrika.

from Naya Patrika https://ift.tt/2Gdo4xH