जर्मनीमा मर्केलको पार्टीमा नयाँ उत्तराधिकारी चयन

जर्मन चान्सलर एन्जेला मर्केलले पार्टीको नेतृत्व त्यागेसँगै जर्मनीमा नयाँ नेतृत्व चयन भएको छ । मर्केलले क्रिस्चियन डेमोक्र्याटिक युनियन (सिडियू)को उच्च पद त्यागेपछि नयाँ नेतृत्वको चयन भएको हो । उनी विगत दुई दशकदेखि पार्टीको उच्च नेतृत्वमा थिइन् । पार्टी नेतृत्वमा असफल भएको भन्दै मर्केलको आलोचना भइरहेका वेला उनले नेतृत्व त्यागेकी थिइन् । उनले यसअघि नै सन् २०२१ मा राजनीतिबाट सन्न्यास लिने घोषणा गरिसकेकी छिन् ।

नयाँ बोतलमा पुरानो रक्सी
क्राम्पको विजयलाई अधिकांशले नयाँ बोतलमा पुरानो रक्सीको संज्ञा दिएका छन् । उनको विजयले सिडियूलाई खासै फरक नपर्ने बताइएको छ । ‘क्राम्पलाई धेरैले मर्केलकै निरन्तरताका रूपमा हेरेका छन् । तसर्थ, पार्टीलाई नौलो ढंगले अगाडि बढाउनेमा शंका छ,’ विश्लेषक डोमिनिक काने भन्छन् । ‘आगामी केही साता, महिना र वर्ष यी दुई महिलालाई विभिन्न पत्रकार सम्मेलनमा सामूहिक रूपमा देख्न सकिन्छ । मर्केलले बिस्तारै सरकारबाट पनि क्राम्पलाई शक्ति हस्तान्तरण गर्नेछिन् ।’ तर, क्राम्पको विजयले केही उत्साहित पनि भएका छन् । ‘क्राम्पको विजयले आगामी निर्वाचनमा पार्टीलाई सशक्त रूपमा अगाडि लानेछ,’ अर्थमन्त्री पिटर अल्टमेयरले भने ।

विवादबीच नयाँ नेतृत्व चयन
मर्केलले पदत्याग गरेपछि क्रिस्चियन डेमोक्र्याटिक युनियनमा आन्निग्रेट क्राम्प–कारेन्बर चयन भएकी छिन् । यसअघि उनी सिडियूका उपप्रमुख थिइन् । जर्मन सहर ह्यामबर्गमा भएको पार्टी महाधिवेशनले उनलाई नयाँ नेतृत्वमा चयन गरेको हो । नेतृत्वका लागि शुक्रबार दुई चरणमा मतदान भएको थियो । मर्केलकी विश्वासपात्र क्राम्प कारेन्बरले फ्रेडरिक मर्जलाई पराजित गरेकी हुन् । दोस्रो चरणको निर्वाचनमा क्राम्पले ५१७ मत पाएकी थिइन् भने मर्जले ४८२ पाएका थिए ।

यसअघि पहिलो चरणको मतदानमा क्रयाम्पले ४५० र मर्जले ३९२ मत ल्याएका थिए भने अर्का प्रतिस्पर्धी तथा स्वास्थ्यमन्त्री जेनस स्पाहन १५७ मत प्राप्त गरी पहिलो चरणबाटै बाहिरिएका थिए । मर्ज आप्रवासविरोधी नेताका रूपमा चिनिन्छन् । उनी मर्केलका कटु आलोचक हुन् । उनले दश लाखभन्दा बढी आप्रवासी र शरणार्थीलाई जर्मनीमा स्वागत गर्ने मर्केलको नीतिमाथि खुलेरै आलोचना गरिरहेका छन् । मर्ज सन् २००२ मा मर्केलसँग पराजित भएका थिए ।

आप्रवासीप्रति लचिली मर्केल
आप्रवासी र शरणार्थीका बारेमा नरम नीति अख्तियार गरेको आरोप सामना गरेकी मर्केलमाथि क्रिस्चियन डेमोक्र्याटिक पार्टी (सिडियू) छाड्ने दबाब बढेको थियो । ‘१८ वर्षसम्म पार्टीको अध्यक्षता गर्न पाएकामा मलाई गर्व लागेको छ । यो निकै लामो अवधि हो र यसबीचमा सिडियूमा धेरै उतारचढाव आएको छ,’ ह्यामबर्गमा आयोजित पार्टी भेलामा उनले भनिन् । तर, चान्सलरमा भने सन् २०२१ सम्म रहने उनले बताएकी छिन् । ‘हामीले मिलेरै चारवटा चुनाव जित्यौँ र म सन् २०२१ सम्म चान्सलर रहनेछु,’ उनले भनिन् । मर्केलले सन् २००५ देखि जर्मनीको नेतृत्व गरिरहेकी छिन् र पार्टी र देशलाई युरोप र विश्वकै राजनीतिक केन्द्रका रूपमा उभ्याएकी छिन् ।

The post जर्मनीमा मर्केलको पार्टीमा नयाँ उत्तराधिकारी चयन appeared first on Naya Patrika.

from Naya Patrika https://ift.tt/2rsoQgb